திருக்கோஷ்டியூர் சவுமிய நாராயண பெருமாள் கோவில்

நள்ளிரவில் சொர்க்கவாசல் திறக்கப்படும் திவ்ய தேசம்

நித்தமும் திறந்திருக்கும் பரமபத சொர்க்க வாசல்

சிவகங்கை மாவட்டம் திருப்பத்தூருக்கு தெற்கில் 8 கிமீ. தொலைவில் அமைந்துள்ள திவ்ய தேசம் திருக்கோஷ்டியூர். திருமாலின் மங்களாசாசனம் பெற்ற 108 திவ்ய தேசங்களில் 104-வது திவ்ய தேசம் இக்கோவில் ஆகும்.பெருமாளின் திருநாமம் சவுமிய நாராயண பெருமாள். தாயாரின் திருநாமம் திருமாமகள்.

இக்கோவிலின் விமானம் 3 அடுக்குகளைக் கொண்ட 'அஷ்டாங்க விமானம்' ஆகும். இதன் உச்சியில் பரமபதநாதர் காட்சியளிக்கிறார். இந்த அடுக்கின் கோபுர பால்கனியிலிருந்தே ஸ்ரீ ராமானுஜர் மக்களுக்கு உபதேசம் செய்தார்.

 வைகுந்தத்தின் பரமபத நிலையை உணர்த்தும் வடிவம், அஷ்டாங்க விமான கோபுரத்தின் கீழ் அமைந்துள்ளது. எம்பெருமானார் ஸ்ரீ ராமானுஜர் அனைத்து மக்களும் உய்யும் பொருட்டு 'ஓம் நமோ நாராயணாய' என்னும் திருமந்திரத்தை இக்கோவிலின் கோபுரத்தின் மீது ஏறி உலகிற்கு உபதேசம் செய்தார்.

பொதுவாக, பெருமாள் கோவில்களில் அதிகாலை, மாலை நேரங்களில் வைகுண்ட ஏகாதசியன்று சொர்க்கவாசல் திறக்கப்படும். ஆனால், திருக்கோஷ்டியூர் சவுமிய நாராயண பெருமாள் கோவிலில் மட்டுமே நள்ளிரவில் சொர்க்கவாசல் திறக்கப்படுகிறது. பெருமாள் கோவிலில் சொர்க்க வாசல் வைகுண்ட ஏகாதசியன்று திறந்து அன்று மட்டுமே பக்தர்கள் அந்த வாசல் வழியாக செல்லுவார்கள். ஆனால், இங்கு வைகுண்ட பரமபத அமைப்பு வழியாக தினமும் பக்தர்கள் சென்று வழிபடலாம்.

உலக நன்மை கருதி அசுர்ர்களை வதம் செய்து தீமை ஒழிய கோஷ்டி கூடியதால் திருக்கோஷ்டியூர் என்று அழைக்கப்படுகிறது. திருக்கு என்றால் பாவம். பாவம் ஓட்டும் என்னும் வகையில் பாவங்கள் தீர்ந்து இன்பம் பெற்றதால் இத்தலம் திருக்கோஷ்டியூர் என்று அழைக்கப்படுகிறது.

இத்தலம் சிறந்த பிரார்த்தனை தலமும் ஆகும். மாசி தெப்பத் திருவிழாவில் விளக்கு பிரார்த்தனை செய்து கொண்ட பல ஆயிரக்கணக்கான பக்தர்கள் தெப்பக்குளத்தைச் சுற்றி விளக்கேற்றி பிரார்த்தனை செய்வது மிகவும் பிரசித்தி பெற்றதாகும்.

பசு மாடு வால் உருவுதல், கால்நடைகளை கோவிலுக்கு விடுதல், பாதாரிஷ்டம் உள்ள குழந்தைகளை கோவிலுக்கு தத்து விடுதல், எடைக்கு எடை துலாபாரமாக தானியம் செலுத்துதல் முதலான பிரார்த்தனைகள் இங்கு மிகச் சிறப்பாக நடைபெறுகின்றன.

பண்னிரன்டு வருடங்களுக்கு ஒருமுறை இக்கோவில் திருக்குளத்தில் கங்கை முதலில் புண்ணிய நதிகள் எழுந்தருள்கிறார்கள்

 

சிவகங்கை மாவட்டம் திருப்பத்தூருக்கு தெற்கில் 8 கிமீ. தொலைவில் அமைந்துள்ள திவ்ய தேசம் திருக்கோஷ்டியூர்.

Previous
Previous

குண்டுக்கரை சுவாமிநாத சுவாமி கோவில்

Next
Next

திருவண்ணாமலை அருணாசலேசுவரர் கோவில்